Томас Коўл

Томас Коўл
англ.: Thomas Cole
Дата нараджэння	1 лютага 1801(1801-02-01)[…]
Месца нараджэння	Болтан, раён Болтан[d], Вялікі Манчэстэр, Вялікабрытанія або Bolton le Moors[d], Вялікабрытанія
Дата смерці	11 лютага 1848(1848-02-11)[…] (47 гадоў)
Месца смерці	Нью-Ёрк, штат Нью-Ёрк, ЗША або Catskill[d], Грын, штат Нью-Ёрк, ЗША
Грамадзянства	ЗША  Злучанае каралеўства Вялікабрытаніі і Ірландыі
Род дзейнасці	мастак, ілюстратар
Жанр	пейзаж
Мастацкі кірунак	Hudson River school[d]
Уплыў на	Frederic Edwin Church[d]
Медыяфайлы на Вікісховішчы

То́мас Коўл (англ.: Thomas Cole; 1 лютага 1801 — 11 лютага 1848) — амерыканскі мастак-пейзажыст, заснавальнік Школы ракі Гудзон, адной з найбольш уплывовых школ жывапісу ЗША XIX стагоддзя.

Біяграфія

Томас Коўл нарадзіўся ў 1801 годзе ў горадзе Болтан у Англіі. У 1818 годзе яго сям’я эмігравала ў Злучаныя Штаты і асталявалася ў горадзе Сцьюбенвіл штата Агая, дзе Коўл пачаў вывучаць асновы сваёй прафесіі ў вандроўнага мастака-партрэтыста Стэйна. Асаблівы поспех у напісанні партрэтаў яму не спадарожнічаў, таму неўзабаве ён пераключыў сваю ўвагу на стварэнне краявідаў.

У 1825 годзе Коўл пераехаў у Нью-Ёрк, дзе яму ўдалося прадаць некалькі сваіх работ заможнаму камерсанту Джорджу Бруену, які неўзабаве прафінансаваў летнюю паездку Коўла ў даліну Гудзон, дзе той напісаў такія свае вядомыя працы як Вадаспад Каатэрскіл і Від форта Патнэм. Вярнуўшыся ў Нью-Ёрк, мастак выставіў напісаныя ў падарожжы краявіды на вітрыне кнігарні, што прыцягнула ўвагу Джона Трамбала, Эшэра Дзюрана і Уільяма Данлэпа. Асабліва ўражаны працамі юнага пейзажыста аказаўся мастак Джон Трамбал, які, знайшоўшы Коўла, купіў адну з яго работ і пазнаёміў яго з Робертам Гілмарам і Дэніелам Уодсвартам, якія сталі заступнікамі мастака.

Акрамя пейзажаў Коўл займаўся напісаннем алегарычных прац. Найбольш вядомыя з іх — серыя з пяці карцін «Шлях імперыі» (англ.: Course of Empire, 1833—1836), а таксама серыя «Падарожжа жыцця» (англ.: The Voyage of Life), якая складаецца з карцін, прысвечаных чатыром перыядам жыцця чалавека: дзяцінству, юнацтву, сталасці і старасці.

Коўл стаў заснавальнікам Школы ракі Гудзон, у якую ўваходзіла больш за 50 пейзажыстаў. Школа праслаўляла дзікую прыроду Амерыкі і ставіла пад сумнеў мэтазгоднасць тэхнічнага прагрэсу. У працах мастакоў школы прырода апісвалася як эталон некранутасці і чысціні, падкрэсліваючы тым самым боскасць яе паходжання.

Ягоная сястра Сара таксама была мастачкай.

Томас Коўл быў жанаты, меў 5 дзяцей.